Gstanzln übers Unterbaarer Bier

von Xaver Wegele, Ehekirchen-Buch  © 2021

1. Grüaß Gott liabe Freunde
schaugts aufi zu mir  
jetz sing i poor Gstanzln
über´s Unterbaarer Bier.

2. Des Unterbaarer Bier,
ob dunkel oder hell
bei de Musikanten do merkt ma´s
es wirkt ziemlich schnell.

3. Ein Bier aus Unterbaar
des schmeckt so wunderbar.
Aber zwoa Unterbaarer
schmecka no wunderbarer.

4. Neuli hob i an Alptraum ghabt,
ja des war a Gschiss,
i hob traamt, dass den Unterbaarern
des Bier ausganga is.

5. Ja i mächat net in Urlaub
nach Arabien nunter fohrn
i hob ghört, dass do druntn
koa Unterbaarer Bier gor net hom.

6. Und wär i aus Minka (München)
do taats mir scho stinka.
Do kannst nirgendwo
a Unterbaarer trinka.

7. Mei Freind sagt: mit Viagra
do kannst wia a Stier.
Aber i kanns no vui besser
mit´m Unterbaarer Bier.

8. Und wenn mi as Lebm freit,
do trink i scho in aller Früah
zum Frühtstück statt an Kaffee
des Unterbaarer Bier.

9. Und kimm i amoi in Himmi,
oder ins  Fegfeuer dann schier.
Des is wurscht, Hauptsach es gibt dort
a Unterbaarer Bier.

10. Die Apfiküchla vo meiner Frau
ja dia schmecka mia
weil sie rührt halt den Toag
mit Unterbaarer Bier.

11. Des Unterbaarer Bier
des liegt mir no heut im Magn.
I glaub i hob oane
von de zehn Hoibe net veretragn.

12. Der Pfarrer in der Kircha
des tätn scho reizn
der mächat statt an Messwein
liaber a Unterbaarer Weizn.

13. Der Landrat, der Bürgermoaster
und der Herr Pfarrer
dia trinka zu de Weißwürst
am liabstn a Unterbaarer.

14. Wenn i aufn Berg geh
do bin i ganz gschafft.
Im Rucksack hob i a Unterbaarer
des gibt mia wieder Kraft.

15. Und wenn i beim Tennisspuin
aa manchmoi verlier.
Die Hauptsach es gibt nachher
a Unterbaarer Bier.

16. Und geh i zum Kammerfensterln
und ´s Dirndl is scho müad
dann trink ma a Unterbaarer
dann laffts glei wia gschmiert.

17. Und bin i alloa
trink i a Hoibe oder zwoa
oder drei oder vier
von dem Unterbaarer Bier.

18. Bevor i im Winter
beim Schifoahrn erfrier
setz i mi liaber in d´ Hüttn
und trink a Unterbaarer Bier.

19. Und  kriag i Corona
dann brauch i koa Remdesivir
weil am bestn gegen Viren
hilft des Unterbaarer Bier.

20. Und wenn i amoi gstorbn bin
und steh vor der Himmelstür,
sog i: Euer Manna könnts selber saufa
i möcht a Unterbaarer Bier.

21. Ja i mächt mi jetz bei Eich bedankn
liabe Gäste und liabe Leit
bei so einem nettn Publikum
macht doch des Gstanzlsinga a Freid.