Bayerische Gstanzln gesammelt von Xaver Wegele, Ehekirchen (G´stanzln )

1.           Liabe Gäste, liabes Publikum
i frei mi natürlich scho,
wenn i an Hochzeitsloder an Paula Kuni
jetz a weng aussinga ko.

2.           Ehekircha is net nur  berühmt woarn
durch’s Hochzeitsfest und durchs -Bier
sondern in der Hauptsach von de -Gstanzln
und die san vo mir.

3.           Ja der Hans, hot sich zum Badn
neilich in sein Froschweiher einiglegt.
jetz -is dabei des ganze Wasser überglaffa
dann san die ganzn Frösch drin verreckt.

4.           Der Kuni und a Pappagei,
die ham die ganz gleiche Natur
wenn dia an >Schnobi amoi aufham
ja dann bringen sie´n nimma zua.

5.           Der Kuni geht zu Steiners Theaterstadl
er moant, dass des des richtige für eahm waar
und macht an bayerischen -Deppen,
weil do tuat er sich net schwaar.

6.           Ja der Kuni sagt, i verstehs net,
jetz ernähr i mi doch so gsund
hauptsächlich von Weißwürst, Bier und Leberkaas
aber abgnomma hob i no koa Pfund.
(und trotzdem bin i so rund.)

7.           Der Huaber Hans kimmt aus Schönesberg
bei die Kartoffibauern do drunt;
und i glaub der isst jedn Tog 2 Kilo Erdäpfi
drum is er gor a so gsund.

8.           Der Kuni mog koan Salat,
und koane Mohrrüben gor net probiern
er hot Angst, er kaannt lange Ohrwaschl
und a Stummelschwanzerl kriang. Xw.

9.           Der Kuni is a scheena Mo
vom Fuaß bis zum Hals
aber dann kimmt der Kopf
und der verschandelt wieder all’s.

11.       Ja neili in Ingolstodt hob i gmoant
 i hätt an Kuni auf der Straßn gseng
dawei hobi nomoi umgschaut
is am Mülltonne gwe´n

12.       Bei der Liebe draht der Kuni oiwei `s Liacht aus
damit die Stromrechnung net so teuer wird.
Aber sei Frau sagt, dass sich des oamoi im Monat
halt überhaupt net rentiert.

13.       A Musikant, der wo nix trinkt
und a Hochzeitlader, der wo net singt,
der waar grod a so wia a Gockl
der net auf d’ Henn aufispringt.

14.       Ja beim Kuni woaß ma net wo er herstammt
wo er geboren is, ham mir nia erfohrn.
weil den ham nähmlich d’ Zigeuner
auf der Durchfahrt verlorn.

15.       Kuni du bist jetz scho 40 Johr Hochzeitslader
i glaub scho, dass dir des gfoit,
do host du dir scho zwoa Häuser verdeant
aber no koan Pfennig Steuern davo’ zoit.

16.       Ja Kuni deine Schuah,
dia san aa ganz verwoacht,
ja host du denn jetz grod
in d’ Hosen neigsoacht.

17.       Vo` Schönesberg kimmst  her,
wo d Leit die Erdäpfel hoin
Drum bist so schee gwachsn,
wia die Erdäpfiknolln.

18.       Der Kuni sagt: mit mein Weiberl
do tua i mi öfters amoi zkriang
dia redt oiwei von Vögln
und i siehg koan fliang.

19.       Ja Kuni, dass du guat singa kannst
des woaß i natürlich scho
aber z’erst bei deiner oidn Witz
waarn die Leit scho beinah davo’.

20.       In Tiergarten bin I ganga,
hob meine Augen gor net traut,
do hob i gmoant, do hot der Kuni,
aus an Affenkäfig außag'schaut

21.       Der Kuni der hot a Kreuz
so  wia a Stier, do verreck,
Zwar net so broat und so kräftig
aber genauso voll Dreck

22.       Ja i glaub unser Wirt ja,
der mog si net gern -plong
sunst tat er mia ja scho -lang
a Maß Bier aufitrong

23.       Wenn der Kuni a Hochzeit hält,
do macht der des im Tausch
mitbringa tuat er seine G’stanzl
und hoambringa tuat er jeds moi an Rausch.

30.       Ja  wenn ma dich so ooschaut
ja do mächt ma scho moan
der Mensch stammt vom Affn ab,
und des von koam kloan.

31.       Jeder Rehbock hot sei Gweih auf
jeder Jaager hot sein Hund
der Kuni hot an Kopf auf
wia Semmi so rund.

32.       Ja der Kuni hot unter seiner Nosn
an so an Schnurbart, a so a Kraut
des siegt aus wia a Bisamratz
der von der Badwanna rausschaut.

33.       Manchmoi traamt ma von die Ochsn
vom Teifi und von die Küah
dann traamt ma von de Hochzeitsloder
wos gscheits traamt ma nia.

34.       Der Kuni hot heit VIAGRA gnumma
na hot er gmaont, do waar er wieder amoi auf Zack
na hot er’s a weng langsam nuntergschluckt
drum hot der heit gor a so a dicks Gnack.

35.       Der Kuni hot scho wieder zvui trunka
i schaugn eahm jetz die ganz Zeit scho oo.
i muass mi scho wundern,
dass er sein Stecka no oiwei hebn ko.

36.       Ja Kuni in deiner Lederhosn
des klingt vielleicht a bisserl wirsch
jetzt wenn du no aufn Kopf a Gweih hättst
dann waarst a reinrassiger Hirsch.

37.       Ja Kuni mit deiner Lederhosn,
do bischt du ja wirklich süaß.
Die zwoa Stecka, die wo do untn rausschaung,
san des vielleicht deine Füaß ?

38.       Ja wia der Kuni so ausschaut,
daran hamma uns scho gwöhnt
i glaub dass ma den, wenn ma‘n in Saustoi neituat
von den Säu net wegkennt.

39.       Kuni du host scho lumperts Fahrgstell
und an Schwimmreifen, der fast platzt
wenn du zum TÜV müassatst, do hättns dir
scho lang die Plakettn obakratzt.

40.       Die Musikantn spieln hoch
und die Musikantn spieln tiaf
manchmoi spuins grod
und manchmoi spuins schiaf.

41.       Und wennst du so dumm doher redst,
ja nachat machst mi fei hoaß,
weil na sog i dast oiwei in d´ Hosn bieslst
und wos i sonst no alls woass.

42.       Kuni wenn du amoi stirbst
bevors di eigrom des muaß i song
do müassns dei Mundwerk
amoi extra daschlong.

43.       Ja des Gstanzl wos grod gsunga host
ja um des Gstanzl do is echt schod.
Weil i möcht song, dass des Gstanzl
mei Großmuatta scho gsunga hot.

44.       Ja es gibt Leit mit ara Hacklnosn
und es gibt Leit mitm schiafn Mäu
aber a so a Letschn, wia der Kuni hot
ja so wos gibt‘s net oiwei.

45.       Der Kuni, ja der moant oiwei
er waar bsonders  schee,
aber wenn i a so ausschaugat do taat i net amoi
zum Schwammerlsuacha geh.

46.       Koan Rinderwahn kannst du net kriang
des woaß i ganz gwiß
ja weil nämlich der Rinderwahn
a Hirnkrankheit is.

47.       Ja i taat scho no gern oans singa
aber wia kanns denn bloß sei
wenn i an Kuni sei dumms Gsicht siehg
do foit mia wirklich nix mehr ei‘,

48.       Dann wünsch i eich a guate Gsundheit
vuil Glück und a scheens Le’m.
I hoff dass wir uns im nächstn Johr
dann wiederum seng

49.       Ja Kuni du kannst schee Gstanzl singa
des haut scho guat hi‘
aber der scheener von uns zwoa
der bin oiwei no i.

50.       Ja Kuni, des wos jetz gsunga host
des hot alles koan Wert,
unser Nachbar hot a Kaiberl
des genau a so plärrt.

51.       Ja Kuni i moan, mit dei’m Gstanzl
do host jetz scho a weni´ übertrie‘m
ja i glaub fast,  von dei’m letztn Rausch,
is dir  aa a weng wos blie’m.

52.       Jetz hom ma anander ausgsunga
aber i glaub,  der wo uns kennt
der woaß,  mir Gstanzlsänger und Hochzeitslader
mir san trotzdem recht guate Freind.

53.       Ja mir Gstanzlsänger san doch koane Rowdi
mir macha doch bloß a Gaudi,
und unser Wesn is doch net gschert
mir san doch aa Leit wias sich’s ghört.

54.       Jetz muass i wieder aufhörn mitm Singa
weil sunst ziagt sichs wieder so in d’Läng
i woaß doch, dass unserer Fraun
wieder weiterraatschn möng.

55.       Und jetz dank i Eich sche
pfuit eich Gott i muaß -geh
und i glaubt ihr habts nix da-geng
wenn ma uns wieder amoi seng.

56.       Ja aus is und gor is,
do is jetz wirklich schod
i wünsch eich a guate Zeit
pfüats eich gsund und bleibts Gott.

57.       Ja aus is und gor is
und schod is dass wor ist
nehmts eure Maßkrüag und stoasts oo
a jeder sauft wos er ko.

58.       Ja i mächt mi jetz bedanken
liabe Gäste und liabe Leit
bei so am netten Publikum
macht doch des Gstanzlinga no a Freid.

59.       Ja i mächt mi jetz bedankn
i muass jetz leider geh,
bei so an nettn Publikum
is doch des Gstanzlsinga no recht schee